នៅស្ថានីយ៍រថភ្លើងធំមួយក្នុងទីក្រុងតូក្យូ គេសង្កេតឃើញថាមានមនុស្សប្រមាណ ៣០ នាក់បានមកជួបជុំគ្នាដើម្បីធ្វើការប្រឆាំងតវ៉ាមិនចង់អោយមានការរៀបចំព្រឹត្តិការណ៍អូឡាំពិករដូវក្តៅ ដែលនឹងចាប់ផ្តើមនៅទីក្រុងតូក្យូនាថ្ងៃទី ២៤ ខែកក្កដាខាងមុខនេះ។

ក្រោយពីប្រធានគណៈកម្មាធិការអូឡាំពិកអន្តរជាតិ IOC លោក Thomas Bach បានលុបចោលដំណើរទស្សនកិច្ចរបស់ខ្លួនមកកាន់ទីក្រុងតូក្យូដោយសារតែវិបត្តិ Covid-19 ប្រទេសជប៉ុន មានប្រជាជនមួយចំនួនចាប់ផ្តើមធ្វើការតវ៉ាហើយ និងថែមទាំងបានអះអាងថាការលុបចោលទស្សនកិច្ចនេះ ប្រាកដណាស់ថារដ្ឋាភិបាលគួរតែដឹងពីច្បាស់ហើយជុំវិញស្ថានភាពធ្ងន់ធ្ងរនៃវីរុស COVID-19 នៅប្រទេសជប៉ុន ជាពិសេសនៅទីក្រុងតូក្យូផ្ទាល់។

រដ្ឋាភិបាលជប៉ុនបានប្រកាសពន្យាពេល ការដាក់ទីក្រុងតូក្យូ និងតំបន់ចំនួន ៥ ផ្សេងទៀតក្នុងគ្រាអាសន្ននៅ បន្ទាប់ពីជប៉ុនកំពុងរងគ្រោះនៃការឆ្លងរីករាលដាលមេរោគ Covid-19 ដែលជាប្រភេទវីរុសបម្លែងខ្លួនពីចក្រភពអង់គ្លេស។ កោះ Hokkaido, Hiroshima និង Okayama រួមជាមួយទីក្រុង Tokyo និង Osaka ជាដើម ដែលសុទ្ធតែទីតាំងប្រកួតអូឡាំពិកនោះ សុទ្ធតែស្ថិតនៅក្រោមការរឹតត្បិត ដើម្បីទប់ស្កាត់ការចំលងរហូតដល់ថ្ងៃទី ៣១ ខែឧសភា។

ជប៉ុនមកដល់ពេលនេះមានអ្នកឆ្លង Covid-19 សរុបជិត ៧០ ម៉ឺននាក់ និងមានអ្នកស្លាប់ដល់ទៅជាង ១ ម៉ឺននាក់៕